2019-imi kvartalimi siullermi siorna taamaalineranut naleqqiullugu saarulliit akii qaffariangaatsiarput qalerallillu
akii appialaarlutik
Kalaallit Nunaanni Naatsorsueqqissaartarfiup aalisakkat akiinut naleqqersuutit 2019-imi kvartalimi siullermut tunngasut saqqummersippai. Aalisakkat tassaapput kinguppanni, qaleralinni saarullinnillu tunisassiat, 2010-mut oqimaalutarneqartut.
Agguaqatigiissillugu kiilumut akinik naleqqersuutinik naatsorsuinermi nunatta avammut niuernerani akit annertunerusumik atorneqarput, ilaatigut tunisassiortut anginerit akigititaannik tapertaqartarlutik. Tassa akinik naleqqersuutit Kalaallit Nunaanniit annissinermi akigitinneqartoq atorneqarluni.
Aalisakkat naleqqersuinermi taaneqartut oqimaassusiisa katinneri 2010-mi oqimaalutaaneq malillugu oqimaalutarineqarput. Taamaasilluni naleqqersuummut oqimaalutaq aaliangersimasoq Laspeyres-mi taaneqartartoq atorneqarluni.
Aalisakkat akiinut naleqqersuut (2010=100)
Malugiuk: Kisitsisaataasivimmik kisitsisit takukkit http://bank.stat.gl/fin009
Aalisakkat akii agguaqatigiissillugu 2018-imi kvartali siullermiit 2019-imi kvartali siullermut ima nikeriarsimapput:
- Kinguppaat akii 12 procentit missaanik qaffariarput.
- Qalerallit akii 2 procentit missaanik appariarput.
- Saarulliit akii 36 procentit missaanik qaffariarput.
Kalaallit Nunaanni Naatsorsueqqissaartarfiup nittartakkamini http://bank.stat.gl/FIN009 –mi tamanut saqqummiussaani naleqqersuutit ineriartorneri takuneqarsinnaapput.